Ancient Greek · ~2 min
Choral 14
Aeschylus, Ἑπτὰ ἐπὶ Θήβας 14.1
Not analysed yet
ὦ μεγάλε Ζεῦ καὶ πολιοῦχοι
δαίμονες, οἳ δὴ Κάδμου πύργους
τούσδε ῥύεσθε,
πότερον χαίρω κἀπολολύξω
πόλεως ἀσινεῖ †σωτῆρι . . ,
ἢ τοὺς μογεροὺς καὶ δυσδαίμονας
ἀτέκνους κλαύσω πολεμάρχους;
οἳ δῆτ᾽ ὀρθῶς κατ᾽ ἐπωνυμίαν
καὶ πολυνεικεῖς
ὤλοντ᾽ ἀσεβεῖ διανοίᾳ.
ὦ μέλαινα καὶ τελεία
γένεος Οἰδίπου τ᾽ ἀρά,
κακόν με καρδίαν τι περιπίτνει κρύος.
ἔτευξα τύμβῳ μέλος
Θυιὰς ὥς, αἱμοσταγεῖς
νεκροὺς κλύουσα δυσμόρως
θανόντας: ἦ δύσορνις ἅ-
δε ξυναυλία δορός.