Ancient Greek · ~7 min
Episode 10, lines 10.890b-10.934
Aristophanes, Θεσμοφοριάζουσαι 10.890b-934
Not analysed yet
βιάζομαι
γάμοισι Πρωτέως παιδὶ συμμεῖξαι λέχος.
τί ὦ κακόδαιμον ἐξαπατᾷς αὖ τὸν ξένον;
οὗτος πανουργῶν δεῦρʼ ἀνῆλθεν ὦ ξένε
ὡς τὰς γυναῖκας ἐπὶ κλοπῇ τοῦ χρυσίου.
βάυζε τοὐμὸν σῶμα βάλλουσα ψόγῳ.
ξένη τίς ἡ γραῦς ἡ κακορροθοῦσά σε;
αὕτη Θεονόη Πρωτέως.
μὰ τὼ θεὼ
εἰ μὴ Κρίτυλλά γʼ Ἀντιθέου Γαργηττόθεν·
σὺ δʼ εἶ πανοῦργος.
ὁπόσα τοι βούλει λέγε.
οὐ γὰρ γαμοῦμαι σῷ κασιγνήτῳ ποτὲ
προδοῦσα Μενέλεων τὸν ἐμὸν ἐν Τροίᾳ πόσιν.
γύναι τί εἶπας; στρέψον ἀνταυγεῖς κόρας.
αἰσχύνομαί σε τὰς γνάθους ὑβρισμένη.
τουτὶ τί ἔστιν; ἀφασία τίς τοί μʼ ἔχει.
ὦ θεοὶ τίνʼ ὄψιν εἰσορῶ; τίς εἶ γύναι;
σὺ δʼ εἶ τίς; αὑτὸς γὰρ σὲ κἄμʼ ἔχει λόγος.
Ἑλληνὶς εἶ τις ἢ ʼπιχωρία γυνή;
Ἑλληνίς. ἀλλὰ καὶ τὸ σὸν θέλω μαθεῖν.
Ἑλένῃ σʼ ὁμοίαν δὴ μάλιστʼ εἶδον γύναι.
ἐγὼ δὲ Μενελάῳ σʼ ὅσα γʼ ἐκ τῶν ἰφύων.
ἔγνως ἄρʼ ὀρθῶς ἄνδρα δυστυχέστατον.
ὦ χρόνιος ἐλθὼν σῆς δάμαρτος ἐσχάρας
λαβέ με λαβέ με πόσι, περίβαλε δὲ χέρας.
φέρε σὲ κύσω. ἄπαγέ μʼ ἄπαγʼ ἄπαγέ με
λαβὼν ταχὺ πάνυ.
κλαύσετʼ ἄρα νὴ τὼ θεὼ
ὅστις σʼ ἀπάξει τυπτόμενος τῇ λαμπάδι.
σὺ τὴν ἐμὴν γυναῖκα κωλύεις ἐμέ,
τὴν Τυνδάρειον παῖδʼ, ἐπὶ Σπάρτην ἄγειν;
οἴμʼ ὡς πανοῦργος καὐτὸς εἶναί μοι δοκεῖς
καὶ τοῦδέ τις ξύμβουλος. οὐκ ἐτὸς πάλαι
ᾐγυπτιάζετʼ. ἀλλʼ ὅδε μὲν δώσει δίκην.
προσέρχεται γὰρ ὁ πρύτανις χὠ τοξότης.
τουτὶ πονηρόν· ἀλλʼ ὑπαποκινητέον.
ἐγὼ δʼ ὁ κακοδαίμων τί δρῶ;
μένʼ ἥσυχος.
οὐ γὰρ προδώσω σʼ οὐδέποτʼ, ἤνπερ ἐμπνέω,
ἢν μὴ προλίπωσʼ αἱ μυρίαι με μηχαναί.
αὕτη μὲν ἡ μήρινθος οὐδὲν ἔσπασεν.
ὅδʼ ἔσθʼ ὁ πανοῦργος ὃν ἔλεγʼ ἡμῖν Κλεισθένης;
οὗτος τί κύπτεις; δῆσον αὐτὸν εἰσάγων
ὦ τοξότʼ ἐν τῇ σανίδι, κἄπειτʼ ἐνθαδὶ
στήσας φύλαττε καὶ προσιέναι μηδένα
ἔα πρὸς αὐτόν, ἀλλὰ τὴν μάστιγʼ ἔχων
παῖʼ ἢν προσίῃ τις.