Ancient Greek · ~7 min
Episode 7, lines 7.77b-7.816
Aristophanes, Ἐκκλησιάζουσαι 7.77b-816
Not analysed yet
λέξουσι γάρ.
καί φασιν οἴσειν ἀράμενοι.
φήσουσι γάρ.
ἀπολεῖς ἀπιστῶν πάντʼ.
ἀπιστήσουσι γάρ.
ὁ Ζεύς σέ γʼ ἐπιτρίψειεν.
ἐπιτρίψουσι γάρ.
οἴσειν δοκεῖς τινʼ ὅστις αὐτῶν νοῦν ἔχει;
οὐ γὰρ πάτριον τοῦτʼ ἐστίν, ἀλλὰ λαμβάνειν
ἡμᾶς μόνον δεῖ νὴ Δία· καὶ γὰρ οἱ θεοί·
γνώσει δʼ ἀπὸ τῶν χειρῶν γε τῶν ἀγαλμάτων·
ὅταν γὰρ εὐχώμεσθα διδόναι τἀγαθά,
ἕστηκεν ἐκτείνοντα τὴν χεῖρʼ ὑπτίαν
οὐχ ὥς τι δώσοντʼ ἀλλʼ ὅπως τι λήψεται.
ὦ δαιμόνιʼ ἀνδρῶν ἔα με τῶν προὔργου τι δρᾶν.
ταυτὶ γάρ ἐστι συνδετέα. ποῦ μοὔσθʼ ἱμάς;
ὄντως γὰρ οἴσεις;
ναὶ μὰ Δία, καὶ δὴ μὲν οὖν
τωδὶ ξυνάπτω τὼ τρίποδε.
τῆς μωρίας,
τὸ μηδὲ περιμείναντα τοὺς ἄλλους ὅ τι
δράσουσιν εἶτα τηνικαῦτʼ ἤδη—
τί δρᾶν;
ἐπαναμένειν, ἔπειτα διατρίβειν ἔτι.
ἵνα δὴ τί;
σεισμὸς εἰ γένοιτο πολλάκις
ἢ πῦρ ἀπότροπον, ἢ διᾴξειεν γαλῆ,
παύσαιντʼ ἂν ἐσφέροντες ὦμβρόντητε σύ.
χαρίεντα γοῦν πάθοιμʼ ἄν, εἰ μὴ ʼχοιμʼ ὅποι
ταῦτα καταθείμην.
μὴ γὰρ οὐ λάβῃς ὅποι·
θάρρει, καταθήσεις, κἂν ἔνης ἔλθῃς.
τιή;
ἐγᾦδα τούτους χειροτονοῦντας μὲν ταχύ,
ἅττʼ ἂν δὲ δόξῃ ταῦτα πάλιν ἀρνουμένους.
οἴσουσιν ὦ τᾶν.
ἢν δὲ μὴ κομίσωσι, τί;
ἀμέλει κομιοῦσιν.
ἢν δὲ μὴ κομίσωσι, τί;
μαχούμεθʼ αὐτοῖς.
ἢν δὲ κρείττους ὦσι, τί;
ἄπειμʼ ἐάσας.
ἢν δὲ πωλῶσʼ αὐτά, τί;
διαρραγείης.
ἢν διαρραγῶ δέ, τί;
καλῶς ποιήσεις.
σὺ δʼ ἐπιθυμήσεις φέρειν;
ἔγωγε· καὶ γὰρ τοὺς ἐμαυτοῦ γείτονας
ὁρῶ φέροντας.
πάνυ γʼ ἂν οὖν Ἀντισθένης
αὔτʼ εἰσενέγκοι· πολὺ γὰρ ἐμμελέστερον
πρότερον χέσαι πλεῖν ἢ τριάκονθʼ ἡμέρας.
οἴμωζε.
Καλλίμαχος δʼ ὁ χοροδιδάσκαλος
αὐτοῖσιν εἰσοίσει τι;
πλείω Καλλίου.
ἅνθρωπος οὗτος ἀποβαλεῖ τὴν οὐσίαν.
δεινά γε λέγεις.
τί δεινόν; ὥσπερ οὐχ ὁρῶν
ἀεὶ τοιαῦτα γιγνόμενα ψηφίσματα.
οὐκ οἶσθʼ ἐκεῖνʼ οὕδοξε τὸ περὶ τῶν ἁλῶν;
ἔγωγε.
τοὺς χαλκοῦς δʼ ἐκείνους ἡνίκα
ἐψηφισάμεθʼ, οὐκ οἶσθα;