Ancient Greek · ~5 min
Episode 4
Aristophanes, Νεφέλαι 4
Not analysed yet
ἄγε δὴ κάτειπέ μοι σὺ τὸν σαυτοῦ τρόπον,
ἵνʼ αὐτὸν εἰδὼς ὅστις ἐστὶ μηχανὰς
ἤδη ʼπὶ τούτοις πρὸς σὲ καινὰς προσφέρω.
τί δέ; τειχομαχεῖν μοι διανοεῖ πρὸς τῶν θεῶν;
οὔκ, ἀλλὰ βραχέα σου πυθέσθαι βούλομαι.
ἦ μνημονικὸς εἶ;
δύο τρόπω νὴ τὸν Δία·
ἢν μὲν γὰρ ὀφείληταί τί μοι, μνήμων πάνυ·
ἐὰν δʼ ὀφείλω, σχέτλιος, ἐπιλήσμων πάνυ.
ἔνεστι δῆτα μανθάνειν ἐν τῇ φύσει;
λέγειν μὲν οὐκ ἔνεστʼ, ἀποστερεῖν δʼ ἔνι.
πῶς οὖν δυνήσει μανθάνειν;
ἀμέλει καλῶς.
ἄγε νυν ὅπως, ὅταν τι προβάλλω σοι σοφὸν
περὶ τῶν μετεώρων, εὐθέως ὑφαρπάσει.
τί δαί; κυνηδὸν τὴν σοφίαν σιτήσομαι;
ἄνθρωπος ἀμαθὴς οὑτοσὶ καὶ βάρβαρος.
δέδοικά σʼ ὦ πρεσβῦτα μὴ πληγῶν δέει.
φέρʼ ἴδω τί δρᾷς, ἤν τίς σε τύπτῃ;
τύπτομαι,
ἔπειτʼ ἐπισχὼν ὀλίγον ἐπιμαρτύρομαι,
εἶτʼ αὖθις ἀκαρῆ διαλιπὼν δικάζομαι.
ἴθι νυν κατάθου θοἰμάτιον.
ἠδίκηκά τι;
οὔκ, ἀλλὰ γυμνοὺς εἰσιέναι νομίζεται.
ἀλλʼ οὐχὶ φωράσων ἔγωγʼ εἰσέρχομαι.
κατάθου. τί ληρεῖς;
εἰπὲ δή νύν μοι·
τὸ τί;
ἢν ἐπιμελὴς ὦ καὶ προθύμως μανθάνω,
τῷ τῶν μαθητῶν ἐμφερὴς γενήσομαι;
οὐδὲν διοίσεις Χαιρεφῶντος τὴν φύσιν.
οἴμοι κακοδαίμων ἡμιθνὴς γενήσομαι.
οὐ μὴ λαλήσεις, ἀλλʼ ἀκολουθήσεις ἐμοὶ
ἀνύσας τι δευρὶ θᾶττον;
ἐς τὼ χεῖρέ νυν
δός μοι μελιτοῦτταν πρότερον· ὡς δέδοικʼ ἐγὼ
εἴσω καταβαίνων ὥσπερ ἐς Τροφωνίου.
χώρει· τί κυπτάζεις ἔχων περὶ τὴν θύραν;