Ancient Greek · ~7 min
Episode 8, lines 8.1.735-8.1.778
Aristophanes, Ἀχαρνῆς 8.1.735-778
Not analysed yet
πεπρᾶσθαι πεπρᾶσθαι.
ἐγώνγα καὐτός φαμι. τίς δʼ οὕτως ἄνους
ὃς ὑμέ κα πρίαιτο φανερὰν ζαμίαν;
ἀλλʼ ἔστι γάρ μοι Μεγαρικά τις μαχανά,
χοίρως γὰρ ὑμὲ σκευάσας φασῶ φέρειν.
περίθεσθε τάσδε τὰς ὁπλὰς τῶν χοιρίων.
ὅπως δὲ δοξεῖτʼ εἶμεν ἐξ ἀγαθᾶς ὑός·
ὡς ναὶ τὸν Ἑρμᾶν, αἴπερ ἱξεῖτʼ οἴκαδις
ἄπρατα, πειρασεῖσθε τᾶς λιμῶ κακῶς.
ἀλλʼ ἀμφίθεσθε καὶ ταδὶ τὰ ῥυγχία,
κἤπειτεν ἐς τὸυ σάκκον ὧδʼ ἐσβαίνετε.
ὅπως δὲ γρυλλιξεῖτε καὶ κοΐξετε
χἠσεῖτε φωνὰν χοιρίων μυστηρικῶν.
ἐγὼν δὲ καρυξῶ Δικαιόπολιν ὅπᾳ·
Δικαιόπολι, ἦ λῇς πρίασθαι χοιρία;
τί; ἀνὴρ Μεγαρικός;
ἀγορασοῦντες ἵκομες.
πῶς ἔχετε;
διαπεινᾶμες ἀεὶ ποττὸ πῦρ.
ἀλλʼ ἡδύ τοι νὴ τὸν Δίʼ, ἢν αὐλὸς παρῇ.
τί δʼ ἄλλο πράττεθʼ οἱ Μεγαρῆς νῦν;
οἷα δή.
ὅκα μὲν ἐγὼν τηνῶθεν ἐμπορευόμαν,
ἄνδρες πρόβουλοι τοῦτʼ ἔπραττον τᾷ πόλει,
ὅπως τάχιστα καὶ κάκιστʼ ἀπολοίμεθα.
αὐτίκʼ ἄρʼ ἀπαλλάξεσθε πραγμάτων.
σά μάν;
τί δʼ ἄλλο Μεγαροῖ; πῶς ὁ σῖτος ὤνιος;
παρʼ ἁμὶ πολυτίματος ᾇπερ τοὶ θεοί.
ἅλας οὖν φέρεις;
οὐχ ὑμὲς αὐτῶν ἄρχετε;
οὐδὲ σκόροδα;
ποῖα σκόροδʼ; ὑμὲς τῶν ἀεί,
ὅκκʼ ἐσβάλητε, τὼς ἀρωραῖοι μύες
πάσσακι τὰς ἄγλιθας ἐξορύσσετε.
τί δαὶ φέρεις;
χοίρως ἐγώνγα μυστικάς.
καλῶς λέγεις· ἐπίδειξον.
ἀλλὰ μὰν καλαί.
ἄντεινον αἰ λῇς· ὡς παχεῖα καὶ καλά.
τουτὶ τί ἦν τὸ πρᾶγμα;
χοῖρος ναὶ Δία.
τί λέγεις σύ; ποδαπὴ δή ʼστι χοῖρος;
Μεγαρικά.
ἢ οὐ χοῖρός ἐσθʼ ἅδʼ;
οὐκ ἔμοιγε φαίνεται.
οὐ δεινά; θᾶσθε τῶδε τὰς ἀπιστίας·
οὔ φατι τάνδε χοῖρον εἶμεν. ἀλλὰ μάν,
αἰ λῇς, περίδου μοι περὶ θυμιτιδᾶν ἁλῶν,
αἰ μή ʼστιν οὗτος χοῖρος Ἑλλάνων νόμῳ.
ἀλλʼ ἔστιν ἀνθρώπου γε.
ναὶ τὸν Διοκλέα
ἐμά γα. τὺ δέ νιν εἴμεναι τίνος δοκεῖς;
ἦ λῇς ἀκοῦσαι φθεγγομένας;
νὴ τοὺς θεοὺς
ἔγωγε.
φώνει δὴ τὺ ταχέως χοιρίον.
οὐ χρῆσθα; σιγῇς ὦ κάκιστʼ ἀπολουμένα;