Ancient Greek · ~7 min
Episode 8, lines 8.1.779-8.1.822
Aristophanes, Ἀχαρνῆς 8.1.779-822
Not analysed yet
πάλιν τυ ἀποισῶ ναὶ τὸν Ἑρμᾶν οἴκαδις.
κοῒ κοΐ.
αὕτα ʼστὶ χοῖρος;
νῦν γε χοῖρος φαίνεται.
ἀτὰρ ἐκτραφείς γε κύσθος ἔσται.
πέντʼ ἑτῶν,
σάφʼ ἴσθι, ποττὰν ματέρʼ εἰκασθήσεται.
ἀλλʼ οὐδὲ θύσιμός ἐστιν αὑτηγί.
σά μάν;
πᾷ δʼ οὐχὶ θύσιμός ἐστι;
κέρκον οὐκ ἔχει.
νεαρὰ γάρ ἐστιν· ἀλλὰ δελφακουμένα
ἑξεῖ μεγάλαν τε καὶ παχεῖαν κἠρυθράν.
ἀλλʼ αἰ τράφειν λῇς, ἅδε τοι χοῖρος καλά.
ὡς ξυγγενὴς ὁ κύσθος αὐτῆς θατέρᾳ.
ὁμοματρία γάρ ἐστι κἠκ τωὐτῶ πατρός.
αἰ δʼ ἂν παχυνθῇ κἀναχνοιανθῇ τριχί,
κάλλιστος ἔσται χοῖρος Ἀφροδίτᾳ θύειν.
ἀλλʼ οὐχὶ χοῖρος τἀφροδίτῃ θύεται.
οὐ χοῖρος Ἀφροδίτᾳ; μόνᾳ γα δαιμόνων.
καὶ γίνεταί γα τᾶνδε τᾶν χοίρων τὸ κρῆς
ἅδιστον ἂν τὸν ὀδελὸν ἐμπεπαρμένον.
ἤδη δʼ ἄνευ τῆς μητρὸς ἐσθίοιεν ἄν;
ναὶ τὸν Ποτειδᾶν καί κʼ ἄνις γα τῶ πατρός.
τί δʼ ἐσθίει μάλιστα;
πάνθʼ ἅ κα διδῷς.
αὐτὸς δʼ ἐρώτη.
χοῖρε χοῖρε.
κοῒ κοΐ.
τρώγοις ἂν ἐρεβίνθους;
κοῒ κοῒ κοΐ.
τί δαί; φιβάλεως ἰσχάδας;
κοῒ κοΐ.
τί δαὶ σύ; τρώγοις ἄν;
κοῒ κοῒ κοΐ.
ὡς ὀξὺ πρὸς τὰς ἰσχάδας κεκράγατε.
ἐνεγκάτω τις ἔνδοθεν τῶν ἰσχάδων
τοῖς χοιριδίοισιν. ἆρα τρώξονται; βαβαί,
οἷον ῥοθιάζουσʼ ὦ πολυτίμηθʼ Ἡράκλεις.
ποδαπὰ τὰ χοιρίʼ; ὡς Τραγασαῖα φαίνεται.
ἀλλʼ οὔτι πάσας κατέτραγον τὰς ἰσχάδας.
ἐγὼ γὰρ αὐτᾶν τάνδε μίαν ἀνειλόμαν.
νὴ τὸν Δίʼ ἀστείω γε τὼ βοσκήματε·
πόσου πρίωμαί σοι τὰ χοιρίδια; λέγε.
τὸ μὲν ἅτερον τούτων σκορόδων τροπαλίδος,
τὸ δʼ ἅτερον, αἰ λῇς, χοίνικος μόνας ἁλῶν.
ὠνήσομαί σοι· περίμενʼ αὐτοῦ.
ταῦτα δή.
Ἑρμᾶ ʼμπολαῖε τὰν γυναῖκα τὰν ἐμὰν
οὕτω μʼ ἀποδόσθαι τάν τʼ ἐμωυτῶ τʼ ἐμωυτῶ ματέρα.
ὦνθρωπε ποδαπός;
χοιροπώλας Μεγαρικός.
τὰ χοιρίδια τοίνυν ἐγὼ φανῶ ταδὶ
πολέμια καὶ σέ.
τοῦτʼ ἐκεῖνʼ, ἵκει πάλιν
ὅθενπερ ἀρχὰ τῶν κακῶν ἁμῖν ἔφυ.
κλάων μεγαριεῖς. οὐκ ἀφήσεις τὸν σάκον;