Τοῦ αὐτοῦ ἀπολογία πρὸς τὸν βασιλέα Κωνστάντιον, Chapter 13

ἀλλ’ ἐξέτασον διὰ τὴν ἀλήθειαν καί, ὥσπερ γέγραπται, ἐρευνῶν ἐρεύνησον παρόντων ἡμῶν, πόθεν ταῦτα λέγουσιν ἢ πόθεν ηὑρέθη τὰ γράμματα. ἀλλ’ οὔτε τῶν ἡμετέρων τις ἐλεγχθήσεται οὔτε τῶν ἐκείνου φήσειεν ἄν τις· πέπλασται γάρ. καὶ πλέον οὐδὲν τάχα προσήκει ζητεῖν· οὐδὲ γὰρ βούλονται, ἵνα μὴ καὶ ὁ ταύτας γράψας ἐξ ἀνάγκης εὑρεθῇ. ἴσασι γὰρ αὐτὸν οἱ διάβολοι μόνοι καὶ ἄλλος οὐδείς.