Ancient Greek · ~7 min
Episode 15, lines 15.2.1598-15.2.1642
Euripides, Ὀρέστης 15.2.1598-1642
Not analysed yet
ἔσται τάδε.
ἆ ἆ, μηδαμῶς δράσῃς τάδε.
σίγα νυν, ἀνέχου δʼ ἐνδίκως πράσσων κακῶς.
ἦ γὰρ δίκαιον ζῆν σε;
καὶ κρατεῖν γε γῆς.
ποίας;
ἐν Ἄργει τῷδε τῷ Πελασγικῷ.
εὖ γοῦν θίγοις ἂν χερνίβων —
τί δὴ γὰρ οὔ;
καὶ σφάγια πρὸ δορὸς καταβάλοις.
σὺ δʼ ἂν καλῶς;
ἁγνὸς γάρ εἰμι χεῖρας.
ἀλλʼ οὐ τὰς φρένας.
τίς δʼ ἂν προσείποι σέ;
ὅστις ἐστὶ φιλοπάτωρ.
ὅστις δὲ τιμᾷ μητέρα;
εὐδαίμων ἔφυ.
οὔκουν σύ γε.
οὐ γὰρ ἁνδάνουσιν αἱ κακαί.
ἄπαιρε θυγατρὸς φάσγανον.
ψευδὴς ἔφυς.
ἀλλὰ κτενεῖς μου θυγατέρα;
οὐ ψευδὴς ἔτʼ εἶ.
οἴμοι, τί δράσω;
πεῖθʼ ἐς Ἀργείους μολὼν —
πειθὼ τίνα;
ἡμᾶς μὴ θανεῖν· αἰτοῦ πόλιν.
ἢ παῖδά μου φονεύσετε;
ὧδʼ ἔχει τάδε.
ὦ τλῆμον Ἑλένη —
τἀμὰ δʼ οὐχὶ τλήμονα;
σὲ σφάγιον ἐκόμισʼ ἐκ Φρυγῶν —
εἰ γὰρ τόδʼ ἦν.
πόνους πονήσας μυρίους.
πλήν γʼ εἰς ἐμέ.
πέπονθα δεινά.
τότε γὰρ ἦσθʼ ἀνωφελής.
ἔχεις με.
σαυτὸν σύ γʼ ἔλαβες κακὸς γεγώς.
ἀλλʼ εἶʼ, ὕφαπτε δώματʼ, Ἠλέκτρα, τάδε·
σύ τʼ, ὦ φίλων μοι τῶν ἐμῶν σαφέστατε,
Πυλάδη, κάταιθε γεῖσα τειχέων τάδε.
ὦ γαῖα Δαναῶν ἱππίου τʼ Ἄργους κτίται,
οὐκ εἶʼ ἐνόπλῳ ποδὶ βοηδρομήσετε;
πᾶσαν γὰρ ὑμῶν ὅδε βιάζεται πόλιν
ζῆν, αἷμα μητρὸς μυσαρὸν ἐξειργασμένος.
Μενέλαε, παῦσαι λῆμʼ ἔχων τεθηγμένον·
Φοῖβός σʼ ὁ Λητοῦς παῖς ὅδʼ ἐγγὺς ὢν καλῶ·
σύ θʼ ὃς ξιφήρης τῇδʼ ἐφεδρεύεις κόρῃ,
Ὀρέσθʼ, ἵνʼ εἰδῇς οὓς φέρων ἥκω λόγους.
Ἑλένην μὲν ἣν σὺ διολέσαι πρόθυμος ὢν
ἥμαρτες, ὀργὴν Μενέλεῳ ποιούμενος,
ἐγώ νιν ἐξέσῳσα κἀπὸ φασγάνου
τοῦ σοῦ κελευσθεὶς ἥρπασʼ ἐκ Διὸς πατρός.
Ζηνὸς γὰρ οὖσαν ζῆν νιν ἄφθιτον χρεών,
Κάστορί τε Πολυδεύκει τʼ ἐν αἰθέρος πτυχαῖς
σύνθακος ἔσται, ναυτίλοις σωτήριος.
ἄλλην δὲ νύμφην ἐς δόμους κτῆσαι λαβών,
ἐπεὶ θεοὶ τῷ τῆσδε καλλιστεύματι
Ἕλληνας εἰς ἓν καὶ Φρύγας συνήγαγον,
θανάτους τʼ ἔθηκαν, ὡς ἀπαντλοῖεν χθονὸς
ὕβρισμα θνητῶν ἀφθόνου πληρώματος.