Ancient Greek · ~2 min
Choral 6
Euripides, Ἑλένη 6.1
Not analysed yet
Ὀρεία ποτὲ δρομάδι κώ-
λῳ μάτηρ θεῶν ἐσύθη ἀνʼ
ὑλάεντα νάπη
ποτάμιόν τε χεῦμʼ ὑδάτων
βαρύβρομόν τε κῦμʼ ἅλιον
πόθῳ τᾶς ἀποιχομένας
ἀρρήτου κούρας.
κρόταλα δὲ βρόμια διαπρύσιον
ἱέντα κέλαδον ἀνεβόα,
θηρῶν ὅτε ζυγίους
ζευξάσᾳ θεᾷ σατίνας
τὰν ἁρπασθεῖσαν κυκλίων
χορῶν ἔξω παρθενίων
μετὰ κούραν, ἀελλόποδες,
ἃ μὲν τόξοις Ἄρτεμις, ἃ δʼ
ἔγχει Γοργῶπις πάνοπλος,
συνείποντο. Ζεὺς δʼ ἑδράνων
αὐγάζων ἐξ οὐρανίων
ἄλλαν μοῖραν ἔκραινε.