Ancient Greek · ~2 min
Choral 6
Euripides, Ἑλένη 6.1-2
Not analysed yet
δρομαῖον δʼ ὅτε πολυπλάνη-
τον μάτηρ ἔπαυσε πόνον,
μαστεύουσα πόνους
θυγατρὸς ἁρπαγὰς δολίους,
χιονοθρέμμονάς γʼ ἐπέρασʼ
Ἰδαιᾶν Νυμφᾶν σκοπιάς·
ῥίπτει δʼ ἐν πένθει
πέτρινα κατὰ δρία πολυνιφέα·
βροτοῖσι δʼ ἄχλοα πεδία γᾶς
οὐ καρπίζουσʼ ἀρότοις
λαῶν φθείρει γενεάν·
ποίμναις δʼ οὐχ ἵει θαλερὰς
βοσκὰς εὐφύλλων ἑλίκων,
πόλεων δʼ ἀπέλειπε βίος·
οὐδʼ ἦσαν θεῶν θυσίαι,
βωμοῖς δʼ ἄφλεκτοι πέλανοι·
πηγὰς δʼ ἀμπαύει δροσερὰς
λευκῶν ἐκβάλλειν ὑδάτων
πένθει παιδὸς ἀλάστωρ.