Ancient Greek · ~4 min
Episode 9
Euripides, Ἑλένη 9.1
Not analysed yet
ὦ γυναικείαις τέχναισιν αἱρεθεὶς ἐγὼ τάλας·
ἐκπεφεύγασιν γάμοι με. κεἰ μὲν ἦν ἁλώσιμος
ναῦς διώγμασιν, πονήσας εἷλον ἂν τάχα ξένους·
νῦν δὲ τὴν προδοῦσαν ἡμᾶς τεισόμεσθα σύγγονον,
ἥτις ἐν δόμοις ὁρῶσα Μενέλεων οὐκ εἶπέ μοι.
τοιγὰρ οὔποτʼ ἄλλον ἄνδρα ψεύσεται μαντεύμασιν.
οὗτος ὤ, ποῖ σὸν πόδʼ αἴρεις, δέσποτʼ, ἐς ποῖον φόνον;
οἷπερ ἡ δίκη κελεύει με· ἀλλʼ ἀφίστασʼ ἐκποδών.
οὐκ ἀφήσομαι πέπλων σῶν· μεγάλα γὰρ σπεύδεις κακά.
ἀλλὰ δεσποτῶν κρατήσεις δοῦλος ὤν;
φρονῶ γὰρ εὖ.
οὐκ ἔμοιγʼ, εἰ μή μʼ ἐάσεις —
οὐ μὲν οὖν σʼ ἐάσομεν.
σύγγονον κτανεῖν κακίστην —
εὐσεβεστάτην μὲν οὖν.
ἥ με προύδωκεν —
καλήν γε προδοσίαν, δίκαια δρᾶν.
τἀμὰ λέκτρʼ ἄλλῳ διδοῦσα.
τοῖς γε κυριωτέροις.
κύριος δὲ τῶν ἐμῶν τίς;
ὃς ἔλαβεν πατρὸς πάρα.
ἀλλʼ ἔδωκεν ἡ τύχη μοι.
τὸ δὲ χρεὼν ἀφείλετο.
οὐ σὲ τἀμὰ χρὴ δικάζειν.
ἤν γε βελτίω λέγω.
ἀρχόμεσθʼ ἄρʼ, οὐ κρατοῦμεν.
ὅσια δρᾶν, τὰ δʼ ἔκδικʼ οὔ.
κατθανεῖν ἐρᾶν ἔοικας.
κτεῖνε· σύγγονον δὲ σὴν
οὐ κτενεῖς ἡμῶν ἑκόντων, ἀλλʼ ἔμε· ὡς πρὸ δεσποτῶν
τοῖσι γενναίοισι δούλοις εὐκλεέστατον θανεῖν.