Ancient Greek · ~3 min
Choral 4
Euripides, Ἡρακλεῖδαι 4
Not analysed yet
Εἰ σὺ μέγʼ αὐχεῖς, ἕτεροι
σοῦ πλέον οὐ μέλονται,
ὦ ξεῖν’ Ἀργόθεν ἐλθών,
μεγαληγορίαισι δʼ ἐμὰς
φρένας οὐ φοβήσεις.
μήπω ταῖς μεγάλαισιν οὕ-
τω καὶ καλλιχόροις Ἀθή-
ναις εἴη· σὺ δʼ ἄφρων, ὅ τʼ Ἄρ-
γει Σθενέλου τύραννος.
ὃς πόλιν ἐλθὼν ἑτέραν
οὐδὲν ἐλάσσονʼ Ἄργους,
θεῶν ἱκτῆρας ἀλάτας
καὶ ἐμᾶς χθονὸς ἀντομένους
ξένος ὢν βιαίως
ἕλκεις, οὐ βασιλεῦσιν εἴ-
ξας, οὐκ ἄλλο δίκαιον εἰ-
πών· ποῦ ταῦτα καλῶς ἂν εἴ-
η παρά γʼ εὖ φρονοῦσιν;
Εἰρήνα μὲν ἐμοί γʼ ἀρέ-
σκει· σὺ δʼ, ὦ κακόφρων ἄναξ,
λέγω, εἰ πόλιν ἥξεις,
οὐχ οὕτως ἃ δοκεῖς κυρή-
σεις· οὐ σοὶ μόνῳ ἔγχος οὐδʼ
ἰτέα κατάχαλκός
ἀλλʼ οὐ, πολέμων ἐραστάς,
μή μοι δορὶ συνταράξεις
τὰν εὖ χαρίτων ἔχουσαν
πόλιν, ἀλλʼ ἀνάσχου.