Ancient Greek · ~3 min
Episode 13, lines 13.24-13.32
Euripides, Ἡρακλῆς 13.24-32
Not analysed yet
ὦ τὸν ἐλαιοφόρον ὄχθον ἔχων ἄναξ
τί χρῆμά μʼ οἰκτροῖς ἐκάλεσας προοιμίοις;
ἐπάθομεν πάθεα μέλεα πρὸς θεῶν.
οἱ παῖδες οἵδε τίνες, ἐφʼ οἷς δακρυρροεῖς;
ἔτεκε μέν νιν οὑμὸς ἶνις τάλας,
τεκόμενος δʼ ἔκανε, φόνιον αἷμα τλάς.
εὔφημα φώνει.
βουλομένοισιν ἐπαγγέλλῃ.
ὦ δεινὰ λέξας.
οἰχόμεθʼ οἰχόμεθα πτανοί.
τί φῄς; τί δράσας;
μαινομένῳ πιτύλῳ πλαγχθεὶς
ἑκατογκεφάλου τε βαφαῖς ὕδρας.
Ἥρας ὅδʼ ἁγών· τίς δʼ ὅδʼ οὑν νεκροῖς, γέρον;
ἐμὸς ἐμὸς ὅδε γόνος ὁ πολύπονος, ὃς ἐπὶ
δόρυ γιγαντοφόνον ἦλθεν σὺν θεοῖ-
σι Φλεγραῖον ἐς πεδίον ἀσπιστάς.
φεῦ φεῦ· τίς ἀνδρῶν ὧδε δυσδαίμων ἔφυ;
οὐκ ἂν εἰδείης ἕτερον
πολυμοχθότερον πολυπλαγκτότερόν
τε θνατῶν.
τί γὰρ πέπλοισιν ἄθλιον κρύπτει κάρα;
αἰδόμενος τὸ σὸν ὄμμα
καὶ φιλίαν ὁμόφυλον
αἷμά τε παιδοφόνον.
ἀλλʼ, εἰ συναλγῶν γʼ ἦλθον, ἐκκάλυπτέ νιν.