Ancient Greek
Edition urn:cts:greekLit:tlg3141.tlg008.local001
Georgius Acropolites Hist., Carmen in magnum sabbatum 001
Not analysed yet
Στιχηρὸν ψαλλόμενον τῷ ἁγίῳ καὶ μεγάλῳ
σαββάτῳ· ποιηθὲν παρὰ τοῦ κυροῦ μεγάλου
λογοθέτου τοῦ Ἀκροπολίτου. ἦχος πλάγιος β.
εἰς τὸν ἐπιτάφιον ἀσπασμῶν.
Τὸν ἥλιον κρύψαντα
τὰς ἰδίας ἀκτῖνας,
καὶ τὸ καταπέτασμα
τοῦ ναοῦ διαρραγὲν
τῷ τοῦ σωτῆρος θανάτῳ
ὁ Ἰωσὴφ θεασάμενος,
προσῆλθε τῷ Πιλάτῳ
καὶ ἱκέτευε λέγων·
’Δός μοι τοῦτον τὸν ξένον,
τὸν ἐκ βρέφους ὡς ξένον
Αἰγύπτῳ ξενωθέντα·
Δός μοι τοῦτον τὸν ξένον,
ὃν ὁμόφυλοι μισοῦντες
μαστιγοῦσιν ὡς ξένον·
Δός μοι τοῦτον τὸν ξένον,
οὐ ξενίζομαι βλέπειν
τὸν θάνατον τοῦ ξένου·
Δός μοι τοῦτον τὸν ξένον,
ὃς παρῆν εἰς ξενίζειν
τοὺς πτωχοὺς καὶ ξένους.
Δός μοι τοῦτον τὸν ξένον,
ὃν Ἰούδας δολίως
ἀπεξένωσε κόσμου.
Δός μοι τοῦτον τὸν ξένον,
ὃν ὁ φίλος ἀρνεῖται
μὴ εἰδέναι ὡς ξένον.
Δός μοι τοῦτον τὸν ξένον,
[ἵνα κρύψω ἐν τάφῳ,]
ὅτι οὐκ ἔχει ὁ ξένος
τὴν κεφαλὴν ὅπου κλίναι.
Δός μοι τοῦτον τὸν ξένον,
ὃν ἡ μήτηρ ὡς ζῶντα
καθικετεύει βοῶσα·
Εἰ καὶ τὰ σπλάγχνα σπαράττομαι
καὶ τὴν καρδίαν τιτρώσκομαι
νεκρὸν ἄπνουν σε βλέπουσα, ἀλλὰ τῇ σῇ ἀναστάσει
μεγαλυνθῆναι θαρρῶ.’
Τούτοις δυσωπήσας
τὸν Πιλᾶτον τοῖς λόγοις,
ὁ εὐσχήμων λαμβάνει
τὸ σῶμα τοῦ σωτῆρος,
καὶ εὐσχημόνως εἰλύσας
ἐν σινδόνι καὶ μύροις
κατέθετο μνημείῳ,
τοῖς πιστοῖς παρεχόμενος
ζωὴν αἰώνιον καὶ τὸ μέγα ἔλεος.