Ancient Greek · ~1 min
Epigram 6
Homer, Ἐπιγράμματα 6
Not analysed yet
Κλῦθι, Ποσείδαον, μεγαλοσθενές, ἐννοσίγαιε,
εὐρυχόρου μεδέων ἠδὲ ξανθοῦ Ἑλικῶνος,
δὸς δ’ οὖρον καλὸν καὶ ἀπήμονα νόστον ἰδέσθαι
ναύταις, οἳ νηὸς πομποὶ ἠδ’ ἀρχοὶ ἔασι·
δὸς δ’ ἐς ὑπωρείην ὑψικρήμνοιο Μίμαντος
αἰδοίων μ’ ἐλθόντα βροτῶν ὁσίων τε κυρῆσαι,
φῶτά τε τισαίμην, ὃς ἐμὸν νόον ἠπεροπεύσας
ὠδύσατο Ζῆνα ξένιον ξενίην τε τράπεζαν.