Ancient Greek
Section 19
Severianus Gabalensis, In Temptationem Domini Nostri Iesu Christi 19
Not analysed yet
Καὶ ἀπέστη ἄχρι καιροῦ καὶ λοιπὸν προσῆλθον οἱ ἄγγελοι καὶ διηκόνουν αὐτῷ . Τέλος τῆς ἀσκήσεως τὸ ὑπ’ ἀγγέλων διακονεῖσθαι. Ὃ μὲν κακῶς καὶ ἀκαίρως παρήγαγεν ὁ διάβολος, εὐθέως ἐδίδαξεν ὁ φιλάνθρωπος. Ἔλεγε γὰρ ὁ διάβολος ὅτι Τοῖς ἀγγέλοις αὐτοῦ ἐντελεῖται περὶ σοῦ. Σὺ ἀκαίρως παρήγαγες· ὁ θεὸς εὐκαίρως καὶ οἰκονομικῶς, ἵνα δειχθῇ ὅτι τέλος μένει τοῖς ἀγωνιζομένοις· Προσῆλθον οἱ ἄγγελοι καὶ διηκόνουν αὐτῷ. Τίνι; Τῷ σχήματι τῆς ἀνθρωπότητος, τῷ καταπατήσαντι τοὺς δαίμονας, τῷ πατήσαντι ἐπὶ ἀσπίδα καὶ βασιλίσκον, τῷ ἐπιβάντι ἐπὶ λέοντα καὶ δράκοντα. Εἰ μὴ γὰρ πρῶτος αὐτὸς ἐπάτησεν, οὐκ ἂν ἡμῖν ἐξουσίαν ἔδωκε πατεῖν ἐπὶ λέοντα καὶ δράκοντα.