Ancient Greek
Choral 2
Sophocles, Ἠλέκτρα 2.7
Not analysed yet
ἀλλʼ οὖν εὐνοίᾳ γʼ αὐδῶ,
μάτηρ ὡσεί τις πιστά,
μὴ τίκτειν σʼ ἄταν ἄταις.
καὶ τί μέτρον κακότατος ἔφυ; φέρε,
πῶς ἐπὶ τοῖς φθιμένοις ἀμελεῖν καλόν;
ἐν τίνι τοῦτʼ ἔβλαστʼ ἀνθρώπων;
μήτʼ εἴην ἔντιμος τούτοις
μήτʼ, εἴ τῳ πρόσκειμαι χρηστῷ,
ξυνναίοιμʼ εὔκηλος, γονέων
ἐκτίμους ἴσχουσα πτέρυγας
ὀξυτόνων γόων.
εἰ γὰρ ὁ μὲν θανὼν γᾶ τε καὶ οὐδὲν ὢν
κείσεται τάλας,
οἱ δὲ μὴ πάλιν
δώσουσʼ ἀντιφόνους δίκας,
ἔρροι τʼ ἂν αἰδὼς
ἁπάντων τʼ εὐσέβεια θνατῶν.