Book 2, Chapter Δ

243 Δέον· ὥϲπερ Περικλέηϲ εἰϲ τὸ δέον ἀνάλωϲα. Περικλέηϲ Ἀθηναίων ϲτρατηγόϲ, λόγον ἀπαιτούμενοϲ ὑπὲρ χρημάτων Κλεάνδρῳ τῷ ἁρμοϲτῇ Λακεδαιμονίων ἐπὶ προδοϲίᾳ, τοῦτο οὐκ ἐδήλου, ἀλλ᾿ εἰϲ τὸ δέον ἔλεγεν ἀναλῶϲαι αὐτά. οἱ δὲ ἄλλωϲ φαϲί. πολλῶν ὄντων χρημάτων ἐν τῇ ἀκροπόλει, εἰϲ τὸν πόλεμον τὰ πλεῖϲτα ἀνάλωϲε. φαϲὶ δὲ ὅτι καὶ λογιϲμοὺϲ διδοὺϲ ν΄ ταλάντων ἁπλῶϲ εἰπεῖν εἰϲ τὸ δέον ἀνηλωκέναι. μετὰ δὲ ταῦτα μαθόντεϲ Λακεδαιμόνιοι Κλεανδρίδην μὲν ἐδήμευϲαν, Πλειϲτοάνακτα δὲ ε΄ ταλάντοιϲ ἐζημίωϲαν ὑπολαβόντεϲ δωροδοκήϲανταϲ αὐτοὺϲ φείϲαϲθαι τῆϲ λοιπῆϲ Ἀθηναίων γῆϲ, καὶ τὸν Περικλέα, ἵνα μὴ γυμνῶϲ εἴπῃ ὅτι δέδωκα τοῖϲ Λακεδαιμονίων βαϲιλεῦϲι ταῦτα, οὕτωϲ αἰνίξαϲθαι.