Latin · Dactylic hexameter
Part 4, X. in Sancti Mathei.
Aldhelm, Ald. Carm. eccl. 4.10
Not analysed yet
Matheus egregium describens dogma salutis
Ebrea per simplum digessit dicta libellum
Plurima sanctificis narrans miracula scedis,
Quae modo per mundum divulgant scripta triquadrum;
Quem Fison fluvius paradisi fonte redundans
Mire portendit pandens misteria rerum:
Fontis designat salvator iure figuram,
De quo quadrifluis decurrunt flumina rivis:
Quattuor ut quondam nascentis origine saecli
Limpida per latum fluxerunt flumina mundum,
Quae rubros flores et prata virentia glebis
Gurgitibus puris et glauco rore rigabant,
Sic doctrina Dei fluxit de fonte quaterno
Arida divinis irrorans corda scatebris.
Hanc scriptor verax expressit Matheus olim
Quemque profeta Dei sacro spiramine plenus
Humana specie vidit signarier olim,
Quod Christi patres et avos numeraret avorum,
E quis salvator nostrae cunabula sarcis
Sumpserat in mundo scelerata piacula demens.