Latin
18 to 22
Aldhelm, Ald. epp. 18-22
Not analysed yet
Porro tuum discipulatum ceu cernuus arcuatis poplitibus flexisque suffraginibus feculenta fama compulsus posco, ut nequaquam prostibula vel lupanarium nugas, in quis pompulentae prostitutae delitescunt, lenocinante luxu adeas, quae obrizo rutilante periscelidis armillaque lacertorum tereti utpote faleris falerati curules comuntur, sed magis edito aulae fastigio spreto, quo patricii ac praetores potiuntur, gurgustii humilis receptaculo contenta tua fausta fraternitas feliciter fruatur necnon contra gelida brumarum flabra e climate olim septentrionali emergentia neglecto, ut decet Christi discipulum, fucato ostro potius lacernae gracilis amictu ac mastrucae tegmine incompto utatur. . . . DOMINO GLORIOSISSIMO OCCIDENTALIS REGNI SCEPTRA GVBERNANTI ,QUEM EGO, VT MIHI SCRVTATOR CORDIS ET RENVM TESTIS EST, FRATERNA CARITATE AMPLECTOR, GERVNTIO REGI SIMVLQVE CVNCTIS DEI SACERDOTIBVS PER DOMNONIAM CONVERSANTIBVS ALDHELMVS SINE MERITORVM PRAEROGATIVA ABBATIS OFFICIO FVNCTVS OPTABILEM IN DOMINO SALVTEM. Nuper cum essem in concilio episcoporum, ubi ex tota paene Brittania innumerabilis Dei sacerdotum caterva confluxit, ad hoc praesertim congregata, ut pro ecclesiarum sollicitudine et animarum salute ab omnibus decreta canonum et patrum statuta tractarentur et in commune Christo patrocinium praestante conservarentur –his igitur rite peractis omne sacerdotale concilium meam parvitatem pari praecepto et simili sententia compulerunt ,ut ad vestrae pietatis praesentiam epistulares litterarum apices diregerem et eorum paternam petitionem salubremque suggestionem per script〈ur〉ae stilum intimarem, hoc est de ecclesiae catholicae unitate et christianae religionis concordia, sine quibus fides otiosa torpescit et merces futura fatescit. Quid enim prosunt bonorum operum emolumenta, si extra catholicam gerantur ecclesiam, etiamsi aliquis actualem rigidae conversationis regulam sub disciplina coenubii solerter exerceat aut certe cunctorum mortalium contubernia declinans in squalida solitudine remotus contemplativam anachoreseos peragat vitam? Igitur, ut certius vestra |sagacitas animadvertere queat, pro quibus causis mea mediocritas scripta direxerit, compendiose et breviter enucleabo.