Latin
Letter 246
Augustine, Epistulae 246.1
Unproofread scanNot analysed yet
De quaestione fati ac fortunae, qua tuum animum non leuiter moueri et, cum praesens essem, aduerti et nunc tuis litteris gratius certiusque cognoui, rescriptum tibi non parui uoluminis debeo, quod dominus praestabit ut ita explicem, quem ad modum nouit tibi congruere ac saluti fidei tuae. non enim paruum malum est peruersis opinionibus non solum ad committendum blandimento uoluptatis adduci sed etiam ad defendendum peccatum a medicamento confessionis auerti.