Latin
Letter 258
Augustine, Epistulae 258.4
Unproofread scanNot analysed yet
Gratias itaque domino, quod te mihi amicum facere tandem aliquando dignatur. nunc enim nobis est 'rerum humanarum et diuinarum cum beniuolentia et caritate consensio' in Christo Iesu domino nostro uerissima pace nostra. qui duobus praeceptis cuncta praeconia diuina conclusit dicens: Diliges dominum deum tuum ex toto corde tuo et ex tota anima tua et ex tota mente tua et: Diliges proximum tuum tamquam te ipsum: in his duobus praeceptis tota lex pendet et prophetae. in illo primo rerum diuinarum. in hoc secundo rerum humanarum est cum beniuolentia et caritate consensio. haec duo si mecum firmissime teneas, amicitia nostra uera ac sempiterna erit et non solum inuicem nos sed etiam ipsi domino sociabit.