Latin
12
Augustine, Manuale [Incertus] 12
Unproofread scanNot analysed yet
CAPUT X. Postulatio amoris Dei. Amo te, Deus meus, amo, et magis atque magis amare te volo. Da mihi, Domine Jesu speciose præ filiis hominum, ut desiderem te, ut amem te, quantum volo, quantum debeo. Immensus es, et sine mensura debes amari, præsertim a nobis quos sic amasti, sic salvasti, pro quibus tanta ac talia fecisti. (b) O amor, qui semper ardes et nunquam exstingueris! dulcis Christe, bone Jesu, chatitas Deus meus, accende me totum igne tuo, amore tuo, dilectione tua, desiderio tuo, charitate tua, jucunditate et exsultatione tua, pietate et suavitate tua, voluptate et concupiscentia tua, quæ sancta est et bona, quæ casta est et munda: ut totus dulcedine amoris tui plenus, totus flamma tuæ charitatis vaporatus, diligam te Dominum meum dulcissimum et pulcherrimum ex toto corde meo, ex tota anima mea, ex totis viribus meis, et ex omni intentione mea, cum multa cordis contritione et lacrymarum fonte, cum multa reverentia et tremore, habens te in corde, et in ore, et præ oculis meis semper, et ubique; ita ut nultus in me adulterinis amoribus pateat locus.