Latin · Elegiac couplet
〈Epigrammaton Liber.〉, II. Commendatio Codicis.
Ausonius, Opuscula 37.2
Not analysed yet
Est quod mane legas, est et quod vespere, laetis
seria miscuimus, temperie ut placeant.
non unus vitae color est nec carminis unus
lector: habet tempus pagina quaeque suum.
hoc mitrata Venus probat, hoc galeata Minerva,
Stoicus has partes, has Epicurus amat.
salva mihi veterum maneat dum regula morum,
plaudat permissis sobria Musa iocis.