Latin · Elegiac couplet
Epigramma ad somnum, quando laboravi dysenteria Basileae Anno M. CCCC. XCIIII
Bebel, Opuscula nova 4.12
Unproofread scanNot analysed yet
Somne quies rerum multis optate querelis
Cur profugus lectum spernis adire meum.
Proh dolor Hesperio dum mergitur aequore Phoebus
Et gelidae Phoebes cornua plena micant,
Dum placidum somnum capiunt animalia cuncta,
Dum pavidae vulpes antra subire solent.
Omne genus volucrum querna super arbore sopit
Tu Philomela canis gaudia multa ferens.
Solus ego crebros cogor perferre dolores
Perpetuos gemitus pectora nostra trahunt.
Tunc dolor et morbi subeunt. Phantasmata terrent
Nocte atra insomnem, cor mihi triste gemit.
Pono ventris onus decies currens abiensque
Merda rudis torquet sanguine sparsa rudi.
Nec requies umquam poterit mea membra subire
Delphice seu splendes sive Diana soror
Dulcis amice veni cunctis placidissime somne
Mordaci curae tu medicina, salus.