Latin
Chapter 25
Benedict, Regula 25.1
Unproofread scanNot analysed yet
De gravioribus culpis. Is autem frater qui gravioris culpae noxa tenetur, suspendatur a mensa simul et ab oratorio. Nullus ei fratrum in ullo jungatur consortio neque in colloquio. Solus sit ad opus sibi injunctum, persistens in poenitentiae luctu, sciens illam terribilem Apostoli sententiam dicentis, traditum hujusmodi hominem Satanae in interitum carnis, ut spiritus salvus sit in die Domini. Cibi autem refectionem solus percipiat mensura vel hora qua praeviderit abbas ei competere. Nec a quoquam benedicatur transeunte, nec cibus qui ei datur.