Latin
36.48.1 to 36.48.22
Benedict, Regula 36.48.1-22
Unproofread scanNot analysed yet
Sexto, istud S. P. Benedicti statutum permissivum esse, non praeceptivum: quapropter «infirmi si a carne penitus abstinerent, non propter hoc regulam violarent; carnibus namque vesci in regula non est praeceptum monachis, sed permissum, »inquit Goffridus Vindocinensis. Nec defuere plurimi ex priscis monachis qui etiam aegroti carnibus abstinerent. De Condatiscensibus audiendus est in primis anonymus, in Vita sancti Lupicini abbatis, num. 2 (Boll. ,21 Mart.): «Cum nullus in Condatiscensi praesertim coenobio hodie usque, in Christi nomine, de animali quidquam, exceptis lactibus aut de alitibus, praeter ova, infirmans duntaxat audeat degustare, iste tamen saepissime, ne stillam quidem olei, aut, lactis pulticulae saltem suae permisit infundi. »Idem de monachis Grandimontensis ordinis perhibet Jacobus de Vitriaco (Hist. Occid. cap. 19): «Nunquam carnes postquam professiones fecerunt de caetero licet eis manducare, quantacunque aegritudine praegraventur. »Et certe exstat hac de re decretum in Regula S. Stephani praefati ordinis institutoris his verbis contentum (Cap. 57): «Omnes tam sanos quam aegrotos a carne et sanguine, tam volucrum quam quadrupedum, vos semper abstinere jubemus. »Simili disciplina suos informaverat S. Stephanus abbas Obazinensis, antequam ordini Cisterciensi eos subjiceret, ut docet anonymus Vitae scriptor (Lib. ii, num. 14, Miscel. Baluz. ,tom. IV): «Inter caeteras mutationes etiam esus carnium infirmis secundum regulam est allatus, qui hactenus manserat fratribus nostris incognitos: quod gravissime vir sanctus ferebat, in tantum ut diceret ipse commotus, quod carnificinam introduxissent in domum Dei, cum videret propter infirmos aliquod ex animalibus jugulari, cumque ei capitulum regulae pro infirmis opponeretur, ille tacebat, quia nec istud ei placere, nec regulae auctoritas poterat displicere. »Ex Cisterciensibus tamen sanctus Guillelmus Bituricensis archiepiscopus «ex quo saeculum dereliquit, nunquam carnes aliqua infirmitatis necessitate seu alicujus victus persuasione comedit. »Istud institutum hactenus summa cum laude retinent monachi Carthusienses;