Latin
71.891.63 to 71.891.90
Benedict, Regula 71.891.63-90
Unproofread scanNot analysed yet
Vel si leviter senserit animum prioris cujuscunque contra se iratum vel commotum, quamvis modice.] Hildemarus, Bernardus Cassinensis et Boherius, inter commotum et iratum hoc ponunt discriminis, quod iratus dicitur, qui majori inflammatur ira, commotus qui minori. Mox sine mora tandiu prostratus in terra ante pedes ejus jaceat, etc.] Haec communis exsistit veterum monachorum praxis, quam videre est in eorum passim Regulis. In Regula abbatis Isaiae (Cap. 24): «Si peccaveris in aliquo, non pudeat te confiteri illud, neque excuses te mendacio, sed genua flecte, et confitere delictum tuum, et pete veniam, et condonabitur tibi. »In Regula secunda SS. Patrum (Cap. 7): «Et hoc attendendum fuit, ut frater qui pro qualibet culpa arguitur, vel increpatur, patientiam habeat, et non respondeat arguenti, sed hum…liet se in omnibus. »In Regula S. Macarii, cap. 16, ubi eadem leguntur. In Regula S. Aureliani (Cap. 38): «Si quis pro qualibet culpa, aut transgressione Regulae increpatur, aut disciplinam accipit, arguenti respondere non praesumat. »Clarius in Regula Cujusdam ad monachos (Cap. 7): «Ad primum verbum discussionis senioris, sive oeconomi, sive alicujus fratris, venia petenda est, et tandiu in terra prostratus, donec senior discussionem consummaverit: si autem senior discussionem iteraverit, et ipse veniam iterare debet. »In secunda Vita S. Comgalli, n. 22 (Boll. ,10 Maii): «Mos erat in monasterio S. P. Comgalli, ut si quis alium increparet, quamvis ille esset culpabilis aut inculpabilis, statim qui increpabatur genua humiliter flecteret. »In Vita S. Eupraxiae virginis, n. 14 (Bolland. ,13 Mart.), quae ab abbatissa reprehensa, quod tentationes occultasset, «cadens ad pedes abbatissae dixit: Ignosce mihi, domina mea, quia confusa sum indicare tibi hanc causam. »Apud Rufinum de quodam Eulalio referentem (Lib. iii de Vit. Patr. n. 29), quod «cum argueretur a senioribus fratribus, non negabat, sed prosternebat se in terram, et adorans eos se dicebat peccasse, et negligenter fecisse.