1.20

21. In fano autem S. Augustini centum quinquaginta, totidemque in loco altero duodecim inde leucas Septemptrionem versus distante S. Helena dicto, ad arcendos inde exteros omens (ut Anglos Gallosve), si fortassis etiam loca illa incolere vellent, rex milites in praesidio habebat. Quibus omnibus praeerat Petrus Melendez marchio, nepos istius admiralii Melendez qui quindecim sedecimve annos ante classem Ioannis Haukins nostratis, contra fidem data, in portu Mexico invaserat. Is igitur utrique praesidio praefectus in oppido, nobis adventantibus, erat, primusque etiam id deserebat. Ubi inter nostros conventu capitaneorum omnium conclusum fuit ut inde quamprimum propugnaculum S. Helenae occupare tentaremus, ac mox eiusdem regionis tractum quemdam Anglis nostris inhabitatum, atque a regina nostra virgine La Virginia dictum, qui inde Aquilonarem partem versus circiter sex gradus (ut hodie loquimur) distabat, investigaremus. Cum iam autem S. Helena non procul abessemus, ob vadosa illic arenosaque, ac per id perquam periculosa, multa loca cum praesertim nautam neminem viae ibi peritum haberemus, evitandi discriminis nusquam appulimus, sed ulterius porro perreximus. Nam admiralius noster praecedenti nocte quatuor leucis a continente maris ibi profunditatem exploraverat, eamque dumtaxat trium ulnarum et dimidiae esse deprehenderat. Et tamen erant qui nobis dicerent quod ope naucleri vadorum ibi periti naves quaelibet nostris oneratae ac grandes magis eo facile appellere possent. Itaque oram istius regionis, insulis plusculis distinctae, aliquamdiu legimus. Et tandem V. Idus Iun. viso procul ingenti igne, quem in toto illo tractu ubique accendi moris est, generalis noster scapham suam cum sociis navalibus ad littus misit, qui in regione illa aliquot Anglos offenderunt, exque iis unum ad nos secum advexerunt, qui nobis viam ad portum indicavit. Quem cum nostrae naves intrare non possent, anchoras extra eum iecerunt. Ubi eas, postridie quam appuleramus, tempestas ingens corripuit, ut pleraeque anchoras levare ac vela facere cogerentur, quarum quaedam ad reliquam classem, aliae recta in Angliam redierunt. Hic generalis noster Raduldpho Lane generali Anglorum qui in Virginia, ei et suis de rebus omnibus maxime necessariis providere offerebat, navimque maiorem unam e suis cum actuaria ibi relinquere, qua, si intra mensem numerus militum, qui dumtaxat id temporis centum et quinque erat, non suppleretur, in Angliam redire posset. Sed illi adeo inopia rerum omnium ibi pressi ac fracti erant, ut nihil prius optarent quam quamprimum nobiscum in patriam redire. Itaque mox in naves nostras recepti nobiscum inde solverunt.