urn:cts:latinLit:phi0474.phi036.perseus-lat2, Book 2

Laudes autem et vituperationes ex iis locis sumentur, qui loci personis sunt adtributi, de quibus ante dictum est. sin distributius tractare qui volet, partiatur in animum et corpus et extraneas res licebit. animi virtus, cuius de partibus paulo ante dictum est; corporis valetudo, dignitas, vires, velocitas; extraneae honos, pecunia, adfinitas, genus, amici, patria, potentia, cetera, quae simili esse in genere intellegentur.