urn:cts:latinLit:phi0474.phi043.perseus-lat2, Book 1

Cum id et Philus et Manilius et Mummius admodum adprobavissent …Nullum est exemplum, cui malimus adsimulare rem publicam. Quare, si placet, deduc orationem tuam de caelo ad haec citeriora. …non solum ob eam causam fieri volui, quod erat aequum de re publica potissimum principem rei publicae dicere, sed etiam quod memineram persaepe te cum Panaetio disserere solitum coram Polybio, duobus Graecis vel peritissimis rerum civilium, multaque colligere ac docere, optimum longe statum civitatis esse eum, quem maiores nostri nobis reliquissent. Qua in disputatione quoniam tu paratior es, feceris, ut etiam pro his dicam, si, de re publica quid sentias, explicaris, nobis gratum omnibus.