urn:cts:latinLit:phi0474.phi056.perseus-lat2, Book 12, Letter 30

de Attio Dionysio nihil puto esse, quoniam mihi nihil dixit Tratorius. de P. Lucceio nihil tibi concedo, quo studiosior tu sis quam ego sum; est enim nobis necessarius. sed a magistris cum contenderem de praeterendo die, probarunt mihi sese quo minus id facerent et compromisso et iure iurando impediri. qua re veniendum arbitror Lucceio; quamquam, si meis litteris obtemperavit, cum tu haec leges illum Romae esse oportebit.