urn:cts:latinLit:phi0474.phi056.perseus-lat2, Book 7, Letter 27

haec tibi scripsi, ut isto ipso in genere, in quo aliquid posse vis, te nihil esse cognosceres. quod si humaniter mecum questus esses, libenter tibi me et facile purgassem; non enim ingrata mihi sunt quae fecisti, sed quae scripsisti, molesta. me autem, propter quem ceteri liberi sunt, tibi liberum non visum demiror. nam si falsa fuerunt quae tu ad me, ut ais, detulisti, quod tibi ego debeo? si vera tu es optimus testis quid mihi p. R. debeat.