urn:cts:latinLit:phi0474.phi037.perseus-lat2, Book 1

Tum ille immo vero, inquit Sulpici, rogemus Antonium, qui et potest facere, quod requiris, et consuevit, ut te audio dicere: nam me quidem a genere hoc toto sermonis refugisse et tibi cupienti atque instanti saepissime negasse, tute paulo ante dixisti; quod ego non superbia neque inhumanitate faciebam neque quod tuo studio rectissimo atque optimo non obsequi vellem, praesertim cum te unum ex omnibus ad dicendum maxime natum aptumque cognossem, sed me hercule istius disputationis insolentia atque earum rerum, quae quasi in arte traduntur, inscitia.