Latin
Lines 5.173-5.217
Dracontius, Romulea 5.173-217
Not analysed yet
Debilis est pauper, nudus, mendicus, egenus:
quem macies suprema tenet, quem frangit egestas,
unde necem potuit pauper tractare potentis?
Solus abit pauper nec se circumspicit unquam
nec timet insidias semper bene conscius insons.
Sollicitus multos metuit quem turba ueretur:
circumdant famuli, plures stipantur amici;
diuitis obsequio concurrit turba clientum,
sic iter aptatur uel transitus ille paratur,
audeat ut nullus hoc praetereunte uenire.
Taetra uenena neci pretio maiore parantur
et munus secreta fouet: qui conscius unquam
incorruptus erit, quis non sit forte redemptus
quantum diues habet, quantum nec pauper habebit?
Adde quod infelix pauper nec nocte propinquat
diuitis ad tectum. Nam mox pro fure tenetur,
nocturnus grassator erit, ferietur inermis
et prostratus inops armabitur ense cruento,
ut gladium strinxisse putes in fata potentis
diuitis ante fores. Medicos aut forte ministros
sollicitare potest audax sub nocte silenti,
qui sub luce fugit? Pauidos informat egestas;
diuitiae uires praestant animosque resumunt,
paupertas conferre metus, afferre pauorem
nouit et in miseros semper stimulare potentes.
Forsitan obicias "Vrbis defensor habetur";
"non opus est laedatur", ais. Nec laedat honestos,
in commune bonus totos defendat et ornet,
erigat oppressos, mediocris, pauper ametur.
Non ideo bellum tota uirtute peregit
ut liceat ciui ciues impune necare.
Fortior est diues iuuenis, magis inde timendus.
Diuitiae <fortes> semper fecere tyrannos:
hinc Marius, hinc Sylla ferus, hinc Cinna cruentus,
inde fuit Caesar, dominatio prima senatus.
Nam domitor Libyae, bellorum Scipio fulmen,
fortis adultus adhuc totos qui uicit Hiberos
Hannibalisque trucem fregit per bella furorem
ac populatorem Romanae gentis adegit
sorbere mortiferum ceu pocula blanda uenenum
et caput infaustum legatus uexit ad Vrbem,
Minturnas depulsus obit. Pius inde Camillus
missus in exilium nec Romula tecta uideret
ni satis offerret, uictor licet exul ab Vrbe,
cum Romanorum Gallis uexilla tulisset;