Latin · Dactylic hexameter
Lines 9.45-9.96
Dracontius, Romulea 9.45-96
Not analysed yet
Quem retines iratus adhuc; cognosce puellam.
Plangentis germanus erat, cui uita daretur,
ante aciem si uisa foret, Troiaeque periclis
femina bella dedit, sed femina bella negaret.
Da ueniam, iuuenis. Magnum est punisse triumphos
Hectoris, hoc sat erit quod de uictore triumphas;
iam luctus conuerte tuos ad gaudia, uictor,
gaudia qui Phrygibus sollers in funera uertis.
Infelix plus Troia gemit quam perdit Achilles
fortior occisi consurgens ultor amici.
Infremis Aeacides? Qui uindicet Hectora, non est.
Anne Parin Fortuna iubet? Qui crine madenti
inter lanigeras gaudet latuisse puellas
nec mater ueneranda iubet, quod laudis habetur;
hoc agit et pugnam thalamis exercet adulter,
pectore femineo Veneris nam bella lacessit,
ut Martis declinet opus uel fulmina campi
effugiat, magnoque iacet dotata Lacaena
sanguine Troiugenum, Graium dotata cruore.
Dardanidis quis murus erit post Hectora campo,
aduersus Danaos quis Pergama fessa tuetur,
puppibus Argolicis Phrygios quis diriget ignes,
quis Telamone satum constans umbone tonantem
sustinet aut Teucri tolerat per bella sagittas?
Quis hostis Diomedis erit, quae turma furentem
excipit? In clipeum surgens cum torserit hastam
turbine belligero, quis non sine uulnere fractus
concidit et moriens tremibundos porrigit artus?
Tydiden Aeneas rediens in bella lacesset,
a quo uictus abit, qui impressit uulnera Marti?
Nam niueam lusisse fuit plagare Cytheren.
Pergama Pelidi, fateor, post Hectora tractum
non bellum, sed praeda patent spectante triumpho.
Hectoreum si forte canes laniare cadauer
ipse paras crimenque putas, hoc Medus honestum
credit et ad Persas honor est, si membra uolucres
eripiant. Et nulla detur licet ossibus urna,
multis membra tamen condentur rapta sepulchris:
corpus flamma cremans absumit, membra <uorantes>
hoc canis hoc uolucres faciunt; uix ossa relinquunt,
et rogus ossa rapit. Forsan seruabitur Hector,
ut madefacta cadant siccantibus ossa medullis
et longa sub tabe fluant? Hoc cuncta sepulchra
exercent; tamen intererit quod clausa tenebris
putrescant tumulis, at hic sub luce madescant
aspectusque tuos funestent ossa diurnis
uisibus. Andromache tumulum sibi formet inanem
et causam lacrimis faciet quam denegat hostis:
te tamen, Iliacae populator gentis, Achillem
sacrilegi iam poena manet, qui uiua peremptis
funestas elementa uiris. Corrumpitur aer
mortibus, unde caret laesus uitalibus auris;