1.1216 to 1.1227

[123,1216] Esto sane, donemus istud tibi, habes quod glorieris; uicisti rusticitate piscatores, non inuidemus tibi gloriam istam cum agricolis communem, uerum ubi simplicitas apostolica? ubi mores? [123,1217] Num quando uenatos legisti apostolos? num isto ornatu usos accepisti? num pellacarum gregem domi aluerunt apostoli? num tantum opum in unum barathrum demergebant apostoli? [123,1218] Tu si superis placet, apostolos imitandi studio sumptibus ecclesiasticis aedes regales in coelum erigis. [124,1219] Nitet amplissima in domo supellex Attalica, ministris militaribus omnia perstrepunt, coenae Persico instruuntur apparatu, uideas illic agi Sybaritica conuiuia, et quidem assidue, uincitur audacia perdendae rei Cleopatra, uincitur Aesopus cum filio haudquaquam degenere. [124,1220] Fastidiuntur illic acipenseres, non sapiunt murenae, nauseam mouent attagines. [124,1221] Noctes diesque estur, bibitur, luditur, saltatur, subatur et cum uino immodico balbutire coeperint, uidentur (opinor), sibi incultum sermonem apostolorum imitari. [124,1222] Cum his factis, quorum uel Neronem pudeat, audent nobis apostolos imitandos proponere. [124,1223] Nuper cum in Flandria legationem uestro nomine obirem, incidi in huiusmodi portenti conuiuium, ibi inter pocula, ut fit, cum hospitalitatem nobis suam iactitaret, ut festiuiore fabulatione conuiuium exhilararem, Tantali et Lycaonis et his similes nonnullas fabellas commemoraui, rogabat me, ubinam illa legerentur; aio in poetis, orauit protinus, ne illos ethnicos ad suam mensam nominarem, ne foedis nominibus sanctum conuiuium prophanaretur. [124,1224] Gessi morem conuiuatori meo. [124,1225] Aderat theologus quidam, homo adolescens, sed plane doctus, nec ita ut hodie theologorum est uulgus, quorum plerique praeter sophismata nihil didicerunt, uerum ita ut non minus rhetor esset, quam theologus. [124,1226] Cum hoc mihi (assidebat enim proxime) de scriptorum ecclesiasticorum eloquentia sermo incidit, dicebamus Aurelium Augustinum acute quidem, sed subobscure ac perplexe et suo quodam more dicere, et huic tamen esse suam gratiam ob schemata, quae frequenter affectaret. [124,1227] Hieronymi uehementem esse dictionem, uariam, uafram, acrem, locupletem.