Latin · ~7 min
Lines pudoris.128-pudoris.173
Landor, Simonidea, 1806 pudoris.128-173
Not analysed yet
Ille manus manibus rapidas avertit apertis,
Infandumque premit, sic orsus, corde pudorem.
Quid facitis pueri? me spicula vestra timere
Creditis? aetatem vereor, venerorque parentes.
Bigis accipite, intactamque auferte, sororem:
Iam data monstrarunt invisos omina divos.
Theseus haec illis, atque abstinuere loquenti;
Dein, oculos volvens huc illuc, talia secum.
Desponsatam Helenam iuvenis Menelaus habebit?
Imberbes pueri vetularum semper amores,
Virginibus placuit teneris constantior aetas
Aegides Helenae: paribus Fortuna repugnat.
Nempe Clytemnestram cur non abducat Atrides?
Pulcra rudi satis est et saevis dignior Argis.
Tum, repetens bigas haud sicco lumine, clamat,
Fer patienter aves et saxa cruenta, Prometheu!
Praestringunt oculos tibi fulgura, pennipotentes
Insatiabilibus rimantur viscera rostris
Ast alium thalamos haud scandere cernis amatae.
Verba memor retulit virgo gemitusque fidelis
Sed, metuens illos genetrix ne cauta notaret,
Oravit subito reditum narraret Ulyxei,
Candida subrisit Leda, his hortata puellam.
Siquos primus amor bene iunxerit, aurea lucet
Illis quaeque dies: hymenaeos hesperus illis
Quique refert: iuvenis iuveni ducare marito,
Et memor incesto castus quam praestet amori,
Altera Penelope sis tu, tuus alter Ulyxes,
Aegre sustinuit natam pater ire relicto
Et dixisse vale: primum ora madentia fletu
Avertit, turbatam acclinis in ostia frontem;
Accepitque sonum, cum deferretur, equorum,
Nunc imperfecte, nunc clarius: auribus aurae
Desierant adferre; viam non saxa tegebant
Longius: inde animi fractus ruit, impete visum
Debilior neque iam propiores vidit: Ulyxes
Tardius, ut sermone suae frueretur, abibat:
Icarius generum sic voce adpellat anhela.
Redde; dedi, fateor, sed redde, marite, parenti:
Quando dabam non orbus eram: tibi multa placere
Noverit, una meam poterit mulcere senectam.
Redde patri; vel uterque meas redeatis in aedes.
Audiit haec, et lora manu laxata repressit
Dulichius: recipit mitissima nympha gementem,
Dumque senis laevo complexa est colla lacerto,
Frigida rugosam lenibant oscula frontem.