2.1.29 to 2.1.51

CAPUT VICESIMUM OCTAVUM. Dux comiti Calabriam partit. CAPUT VICESIMUM NONUM. Graeci apud Traynam comiti fraudem machinantur. CAPUT TRIGESIMUM. Comes, a Sarracenis captus, se ipsum ense liberat. CAPUT TRIGESIMUM PRIMUM. Comes in Calabriam vadit. CAPUT TRIGESIMUM SECUNDUM. Comes cum Arabicis Castri-Iohannis proeliatur. CAPUT TRIGESIMUM TERTIUM. Bellum Cerami, ubi sanctus Georgius apparuit. CAPUT TRIGESIMUM QUARTUM. Pisani comitem, ut Panormum obsessum vadat, invitant. CAPUT TRIGESIMUM QUINTUM. Milites Comitis, hostibus territis, Turonem, qui postea Guarzonis dictus est, ascendunt. CAPUT TRIGESIMUM SEXTUM. Nostri a tarantis vexantur. CAPUT TRIGESIMUM SEPTIMUM. Ayellum a duce oppugnatur. CAPUT TRIGESIMUM OCTAVUM. Castrum apud Petreleium fit. CAPUT TRIGESIMUM NONUM. Dux Montempilosum obsidet. CAPUT QUADRAGESIMUM. Dux Barum obsidet. CAPUT QUADRAGESIMUM PRIMUM. Comes Rogerius cum Sarracenis proeliatur. CAPUT QUADRAGESIMUM SECUNDUM. Columbae Panormi suos victos nuntiant. CAPUT QUADRAGESIMUM TERTIUM. Dux auxilio comitis Rogerii Barum capit. CAPUT QUADRAGESIMUM QUARTUM. Stilum duci reconciliatur. CAPUT QUADRAGESIMUM QUINTUM. Panormus capitur. CAPUT QUADRAGESIMUM SEXTUM. Serlo occiditur. Incipit liber secundus. Si quaeritur quod, Calabria vel Apulia, iam ex parte non autem ex toto, -quantum ad ea quae in eis facta sunt- descriptis, apud Siciliam describentes transeamus, iterum, quasi digressionem facientes, ad eundem stilum reducturi, sciendum est quod unaquaeque res describenda suum locum, quantum ad tempus quo facta est, exigit, ut rationis series recto tramite testatur, ut quae priora facta sunt, praecedant, quae vero posteriora subsequendo describantur. Comes enim Rogerius, cum primum Siciliam debellaturus egressus est, quae apud Calabriam habebat, non deseruit; sed, cum opportunitas exigebat, exercitu in Siciliam interim dimisso, ipse ad sua negotia disponenda redibat. Multotiens etiam duci fratri auxilium laturus, vel certe in maioribus et dubiis rebus consilium daturus, ut strenuus miles et vir magni consilii, in Apuliam usque transibat. I. Elegantissimus igitur iuvenis comes Calabriae, Rogerius, cum apud Regium cum fratre duce, tota Calabria debellata, moraretur, Siciliam incredulam audiens, et brevissimo mari interposito ex proximo intuens, ut semper dominationis avidus erat, ambitione adipiscendi eam captus est, duo sibi proficua reputans, animae scilicet et corporis, si terram, idolis deditam, ad cultum divinum revocaret, et fructus vel redditus terrae, quos gens Deo ingrata sibi usurpaverat, ipse, in Dei servitio dispensaturus, temporaliter possideret.