Latin
Poem 6
Maximianus, Maximiani Elegiarum Liber 6
Not analysed yet
Claude precor miseras, aetas uerbosa, querelas
numquid et hic uitium uis reserare tuum?
sic satis, indignum leuiter tetigisse pudorem:
contractata diu crimina crimen habent.
omnibus est eadem leti uia, non tamen unus
est uitae cunctis exitiique modus,
hac pueri atque senes pariter iuuenesque feruntur,
hac par diuitibus pauper egenus erit.
ergo quod attritum quodque est uitabile nulli,
festino gressu uincere praestat iter.
infelix ceu iam defleto funere surgo
hac me defunctum uiuere parte puto.