Latin · ~8 min
Lines 1.381-1.427
May, Liber Quartus 1.381-427
Not analysed yet
"Quid pecudum strages, quid singula fata virorum
"Persequar? haud vacat hîc privatas dicere clades.
"In populos furit; et totis cum gentibus atrox
"Bella gerens, ausus Romana lacessere castra est.
"Cum primum turmas Libyes ad litora duxit
"Regulus Ausonias, et in his consederat arvis,
"(Quis mihi de tanto credet certamine?) solus
"Invasit totas acies. Exercitus ille,
"Qui sibi promisit Libyae et Carthaginis altae
"Imperium, quem tot gentes, mundique timebat
"Tertia pars, uno vix se defendit ab angue.
"Dux capere arma jubet, nec solis ensibus illic,
"Aut pilis, sed ballistis, quae monia summa
"Et turres quaterent, monstro nova bella parari.
"Protinus insonuêre tubae; tunc ergit alte
"Se, dirumque caput serpens attollit in auras,
"Undique despiciens campos; tantusque videtur
"Quantus is est, geminas colo qui dividit Arctos.
"Tunc asper saevit; Stygias de gutture diro
"Exhalans nebulas, et flammea lumina torquet.
"Squamea cum volvit sublatus terga, putares
"Excelsum ad pugnas castellum sponte moveri.
"Distantûm longe subito se immittit in ora.
"Hos morsu, afflatu necat hos; hos tollit in altum,
"Ut casu interimat miseros; totasque cohortes
"Sternit humo, latas caudâ dum verrit arenas.
"Consternuntur equi passim, frenisque rebelles
"Invitos saevi dominos serpentis ab irâ,
"Dum fugiunt campo, portant: cessêre manipli;
"Tergaque vertissent (si fas credere) cuncti,
"Ni tandem valido contortum hastile lacerto,
"Dum sese arrectus tollit, sub pectore diro
"Haesisset. Fluxit sanies de vulnere nigra.
"Horrendum immugit, tum primum vulnera passus,
"Longaevus serpens, caudâque flagellat arenas
"Iratus. Cuncti clamorem ad sidera tollunt;
"Speque alacres, validis mittunt per inane lacertis
"Undique pila: ferit pars magna innoxia tergum
"Squamosum monstri; crepitantque sonantia tela,
"Ut sonat aestivus salientis grandinis imber,
"Tegmina tectorum feriens. Hastilia quaedam
"Fortunata magis maculoso vulnera ventri
"Infligunt: solus levibus penetrabilis illi
"Venter erat telis. Nigro humectantur arenae
"Sanguine serpentis, fecundaeque ante venenis
"Gorgoneâ de tabe, novo nunc semine tristes
"Concipiunt iterum pestes, et monstra nefanda.