Latin
PROP. V. THEOR. IV
Newton, Optice 115
Unproofread scanNot analysed yet
Inclinabam itaque Chartam ad Radios valde oblique, sicuti in secundo Experimento hujus Partis feceram, ut Radii maxime Refrangibiles copiosius quam reliqui Reflecterentur: jamque Albitudo se convertebat in colorem caerule um, indicum, &violaceum ex Ordine. Deinde Chartam in contrarias partes inclinabam, ut Radii minime Refrangibiles copiosius quam caeteri reflecterentur; jamque Albitudo convertebat se contrario ordine in flavum, aureum, &rubeum. Denique, Instrumentum XY pectinatim dentatum comparabam, cujus sexdecim Dentes latitudine circiter sesqui-unciales essent, intervalla autem Dentium circiter binas Uncias complecterentur. Atque hujus quidem Instrumenti Dentes prope a Lente per Vices interponens, intercipiebam Dentis interpositi interjectu partem aliquam Colorum, dum reliqui per intervalla Dentium transmissi ad Chartam DE, coloratam super ea Solis Imaginem depingerent. Verum Chartam ante ita collocaveram, ut quotiescunque submotus esset Pecten, Imago alba appareret: Tumque interposito, ut dixi, Pectine; albitudo illa, propter partem Colorum ad Lentem interceptam semper convertebat se in Colorem eum, qui esset ex Coloribus non interceptis Compositus, isque Color, Motu Pectinis, ita variebatur perpetuo, ut interea dum unus quisque Dens praeter Lentem ferretur, Colores hi omnes, Rubeus, Flavus, Viridis, Caeruleus &Violaceus, semper invicem succederent.