Latin
Book 1, lines 1.143-1.188
Orientius, Saint, Commonitorium 1.143-188
Not analysed yet
Et tibi nunc imo trahitur de gurgite piscis,
Aere nunc summo decipiuntur aues.
Agmina uenanti procumbunt densa ferarum
Icta procul iaculis uel laqueata plagis.
Prona petis ferro, canibus fugientia sistis,
Contundis frenis ora ferocis equi.
Ad iuga panda boues cogis, ad mulctra capellas:
Destillant crispis dulcia mella fauis.
De saxis gemmas, aurum producis harenis,
Lentaque de terris igne metalla coquis:
Gramina discernis tristes medicantia morbos,
Pellis letiferum sedulus arte malum.
Quin etiam ut mercem peregrino a litore sumas,
Et tua des aliis atque aliena petas,
Flumina remigio percurres, aequora uelo:
Ibis longinquas absque labore uias.
Aut si formidas pelagus, carpenta mouebis,
Seque tuis sternet terra notanda rotis.
Tum si iactatum quaerit blanda otia corpus,
Vmida puluereum balnea suscipient;
Atque cauo tota spoliatus ueste lauacro,
Marcida perdomitis membra fouebis aquis.
Tot tantisque bonis domini tibi munere partis
Quid tandem dignum reddis amore pio?
Aut quibus haec opibus, quibus et persoluere donis,
Vel quanto poteris pendere seruitio?
Nec tamen haec dominos, cuius sunt omnia, quaerit:
Sufficit ut dominum seruus amatus ames.
Haec quoque mandati succedit forma secundi,
Proximus ut tibi sit sic, uelut ipse tibi es.
Nosco salutiferam mansuro munere legem,
Vno quae cunctis prospicit officio.
Nam cum aliena mihi mandatur cura, necesse est
Vt mea mandetur sic quoque cura alii.
Ecce pecus pecudem fecunda ad pabula ducit,
Admugit proprio bucula laeta gregi.
Murmure respondent, qua possunt uoce loquuntur,
Inque uicem docilis lambere lingua solet.
Nec caret affectu quod fluctibus occulit aequor,
Et uolucris uolucri est et fera blanda ferae.
Tum si quando uenit quocumque ex agmine praedo,
Fortior inualidos ungue uel ore premens,
Seu uolucrum res est, siue est res illa ferarum,
Vndique collectis tenditur auxiliis,
Captiuam comitem cursu grege uoce uolatu,
Etsi non possunt, eripuisse uolunt.