Latin
Book 1, lines 1.325-1.372
Orientius, Saint, Commonitorium 1.325-372
Not analysed yet
Nemo inter flores blandorum ambitus odorum
Naribus assiduam non metet ungue rosam.
Nemo diu sitiens et multo sole perustus
Incumbet gelidis nec potietur aquis.
Nemo uias pedibus brumali tempore carpens
Conspersus pluuia nec madefactus erit.
Nemo, licet mediis muris, sub tempore belli
Vel bene securus uel bene tutus agit.
Congressus praestat uisum, mox lumina uisu
Concipiunt flammas, parturiuntque nefas.
Dum ueluti iacto piscantis fraudibus hamo
Primo animus capitur, post etiam moritur.
Prima mali labes heu femina! te dolus anguis,
Atque hominem per te reppulit a domino.
Erepti tu causa boni, tu ianua mortis,
Tu decepta cito, tu cito decipiens.
Ergo age, qui nullo maculari pectora naeuo
Et purus puro niteris esse animo,
Vt laqueos ignis gladios et acuta uenena
Cernere laudatam sic fugies faciem.
Non ego nunc repetam per tot iam saecula quantos
Feminei uultus perdiderint populos.
Praetereo clades Spartanas, Troica bella,
Et raptu excidium quam prope, Roma, tuum,
Cum gentes nulla domini sub lege nec ullis
Sanctorum ad uitam perdomitas monitis,
Qua furor impulerat, lasciuus duceret auctor,
Esset et hoc licitum quod fuerat libitum.
De sacris, inquam, de sacris percipe libris,
Obprobrio quantis turpis amor fuerit.
Te Dinae species nimio sub amore ruentem
Exstinxit, Sichem, cum patre, cum patria.
Nam male compressam fratrum pia cura sororem
Promittit thalamo, uindicat in gladio.
Hunc quoque laudatum psalmorum carmine Dauid
Forma placens celso deposuit solio,
Cum male lasciuum comperto crimine corpus
Sacco contegeret, contereret cinere.
Thamar forma duos sub eodem tempore fratres
Incesti et ferri perpulit in facinus.
Vnus corrumpit, corruptam ulciscitur alter:
Vltio quae iusta est, desinit esse pia.
Ipse etiam Salomon, cuius sapientia prisco
Tempore et <in> toto nobilis orbe fuit,
Ducitur in facinus uetito laqueatus amore,
Femineo subdens turpia colla iugo,
Et domini immemorem merito praeconia laudum,
Quae iuuenem ornarant, destituere senem.