Latin · ~3 min
Act 4, lines 4.2.885b-4.2.900b
Plautus, Captivi 4.2.885b-900b
Not analysed yet
Vae aetati tuae.
Quippe quando mihi nil credis, quod ego dico sedulo.
sed Stalagmus quoius erat tunc nationis, cum hinc abit?
Siculus.
At nunc Siculus non est, Boius est, Boiam terit:
liberorum quaerundorum causa ei, credo, uxor datast.
Dic, bonan fide tu mi istaec verba dixisti?
Bona.
Di immortales, iterum gnatus videor, si vera autumas.
Ain tu? dubium habebis etiam, sancte quom ego iurem tibi?
postremo, Hegio, si parva iuri iurandost fides,
vise ad portum.
Facere certumst. tu intus cura quod opus est.
sume, posce, prome quid vis. te facio cellarium.
Nam hercle, nisi mantiscinatus probe ero, fusti pectito.
Aeternum tibi dapinabo victum, si vera autumas.
Vnde id?
A me meoque gnato.
Sponden tu istud?
Spondeo.
At ego tuom tibi advenisse filium respondeo.
Cura quam optume potes. —
Bene ambula et redambula.