Latin · ~5 min
Act 3
Plautus, Cistellaria 3.1
Not analysed yet
Rem élocuta sum tibi omnem; sequere hac me, Selenium,
ut eorum quoiam esse oportet te sis potius quam mea.
quamquam invita te carebo, ánimum ego inducam tamen
ut illud quem ad modum tuam in rem bene conducat consulam.
nam hic crepundia insunt, quibuscum te illa olim ad me detulit,
quae mihí dedit, parentes te ut cognoscant facilius.
accipe hanc cistellam, Halisca. ágedum pulta illas fores.
dic me orare ut aliquis intus prodeat propere ocius.
Recipe me ad te, Mors, amicum et benevolum.
Mater mea,
periimus miseraé.
Vtrum hac me feriam an ab laeva latus?
Quid tibi est?
Alcesimarchum non vides? ferrum tenet.
Ecquid agis? remorare. lumen linque.
Amabo, accurrite,
ne se interemat.
O Salute méa salus salubrior,
tu nunc, si ego volo seu nolo, sola me ut vivam facis.
Haud voluisti istuc severum facere.
Nil mecum tibi,
mortuos tibi sum: hanc ut habeo certum est non amittere;
nam hercle iam ad me adglutinandam totam decretum est dare.
ubi estis, servi? occludite aedis pessulis, repagulis
ilico: hanc ego tetulero intra limen. —
Abiit, abstulit
mulierem. ibo, persequar iam illum intro, ut haec ex me sciat
éadem, si possum tranquillum facere ex irato mihi.