Latin · ~7 min
Act 4, lines 4.6.1249-4.6.1277
Plautus, Miles Gloriosus 4.6.1249-1277
Not analysed yet
Immo opperiamur, dum exeat aliquis.
Durare nequeo,
quin eam intro.
Occlusae sunt foris.
Exfringam.
Sana non es.
Si amavit umquam aut si parem sapientiam habet ac formam,
per amorem si quid fecero, clementi ánimo ignoscet.
Vt, quaeso, amore perditast tuo misera.
Mutuom fit.
Tace, ne aúdiat.
Quid astitisti obstupida? cur non pultas?
Quia non est intus quem ego volo.
Qui scis?
Scio pol ego, olfacio;
nam odore nasum sentiat, si intus sit.
Hariolatur.
Quia mé amat, propterea Venus fecit eam ut divinaret.
Nescio ubi hic prope adest quem expeto videre: olet profecto.
Naso pol iam haec quidem plús videt quam óculis.
Caeca amore est.
Tene me óbsecro.
Quor?
Ne cadam.
Quid ita?
Quia stare nequeo,
ita animus per oculos meos meus defit.
Militem pol
tu aspexisti.
Ita.
Non video. ubi est?
Videres pol, si amares.
Non edepol tu illum magis amas, quam ego amem, si per te liceat.
Omnes profecto mulieres te amant, ut quaeque aspexit.
Nescio, tu ex me hoc audiveris an non: nepos sum Veneris.
Mea Milphidippa, adi obsecro et congredere.
Vt me veretur.
Illa ad nos pergit.
Vos volo.
Et nos te.
Vt iussisti,
eram meam eduxi foras.
Video.
Iube ergo adire.
Induxi in animum, ne oderim item ut alias, quando orasti.
Verbum edepol facere non potis, si accesserit prope ad te.
dum te obtuetur, interim linguam oculi praeciderunt.
Levandum morbum mulieri video.
Vt tremit atque extimuit,
postquam te aspexit.
Víri quoque armáti idem istuc faciunt,
ne tu mirere eius mulierem. sed quid illa volt me facere?
Ad se ut eas: tecum vivere volt atque aetatem exigere.
Egon ád illam eam, quae nupta sit? vir eius me deprehendat.
Quin tua causa exegit virum ab sé.