Latin · ~7 min
Act 3, lines 3.1.611-3.1.649_651
Plautus, Mostellaria 3.1.611-649_651
Not analysed yet
Pater eccum advenit peregre non multo prius
illius, is tibi et faénus et sortem dabit,
ne inconciliare quid nos porro postules.
vide num moratur.
Quin feram, si quid datur.
Quid ais tu?
Quid vis?
Quis illic est? quid illíc petit?
quid Philolachetem gnatum compellat meum
sic et praesenti tibi facit convicium?
quid illí debetur?
Obsecro hercle, illud iube
obici illi argentum ob os impurae beluae.
Iubeam—?
Iuben homini argento os verberarier?
Perfacile ego ictus perpetior argenteos.
Audin? videturne, obsecro hercle, idoneus,
danista qui sit, genus quod improbissimum est.
Non ego istuc curo qui sit quid sit unde sit:
id volo mihi dici, id me scire éxpeto,
quod illud argentum est?
Est—huic debet Philolaches
paulum.
Quantillum?
Quasi—quadraginta minas;
ne sane id multum censeas.
Paulum id quidem est.
adeo etiam argenti faenus creditum audio.
Quattuor quadraginta illi debentur minae,
et sors et faenus.
Tantumst, nihilo plus peto.
Velim quidem hercle ut uno nummo plus petas.
dic te daturum, ut abeat.
Egon dicam dare?
Dic.
Egone?
Tu ipsus. dic modo, ausculta mihi.
promitte, age inquam: ego iubeo.
Responde mihi:
quid eo est argento factum?
Salvom est.
Solvite
vosmet igitur, si salvomst.
Aedis filius
tuos emit.
Aedis?
Aedis.
Euge, Philolaches
patrissat: iám homo in mercatura vortitur.
ain tu, aedis?
Aedis inquam. sed scin quoius modi?
Qui scire possum?
Vah.
Quid est?
Ne me roga.
Nam quid ita?
Speculo claras, candorem merum.
Bene hercle factum. quid, eas quanti destinat?
Talentis magnis totidem quot ego et tu sumus.
sed arraboni has dedit quadraginta minas;
hinc sumpsit quas ei dedimus. satin intellegis?
nam postquam haec aedes ita erant, ut dixi tibi,
continuo est alias aedis mercatus sibi.
Bene hercle factum.