Latin · ~8 min
Lines 10.220-10.280
Prudentius, Liber Peristephanon 10.220-280
Not analysed yet
cur in theatris te vidente id plauditur?
cygnus stuprator peccat inter pulpita,
saltat Tonantem tauricornem ludius:
spectator horum pontifex summus sedes
ridesque et ipse, nec negando diluis,
cum fama tanti polluatur numinis.
cur tu, sacrate, per cachinnos solveris
cum se maritum fingit Alcmenae deus?
meretrix Adonem vulneratum scaenica
libidinoso plangit adfectu palam,
nec te lupanar Cypridis sanctae movet?
quid quod sub ipsis veritas signis patet,
formata in aere criminum vestigiis?
quid vult sigillum semper adfixum Iovi
avis ministrae? nempe velox armiger
leno, exoletum qui tyranno pertulit.
facem recincta veste praetendit Ceres:
cur, si deorum nemo rapuit virginem,
quam nocte quaerens mater errat pervigil?
fusos rotantem cernimus Tirynthium:
cur, si Neaerae non fuit ludibrio?
quid? rusticorum monstra detester deum,
Faunos, Priapos, fistularum praesides,
nymphas natantes incolasque aquatiles,
sitas sub alto, more ranarum, lacu,
divinitatis ius in algis vilibus?
ad haec colenda me vocas, censor bone?
potesne quidquam tale, si sanum sapis,
sanctum putare? nonne pulmonem movet
derisus istas intuens ineptias,
quas vinolentae somniis fingunt anus?
aut si quod usquam est vanitatis mysticae
nobis colendum est, ipse primus incipe:
promisce adora quidquid in terris sacri est,
deos Latinos et deos Aegyptios,
quis Roma libat, quis Canopus supplicat.
venerem precaris, conprecare et simiam.
placet sacratus aspis Aesculapii:
crocodillus, ibis et canis cur displicent?
adpone porris religiosas arulas,
venerare acerbum caepe, mordax allium.
fuliginosi ture placantur lares,
et respuuntur consecrata holuscula?
aut unde maior esse maiestas focis
quam nata in hortis sarculatis creditur?
si numen ollis, numen et porris inest.
sed pulchra res est forma in aere sculptilis.
quid inprecabor officinis Graeciae,
quae condiderunt gentibus stultis deos?
forceps Myronis, malleus Polycliti
natura vestrum est atque origo caelitum.
ars seminandis efficax erroribus,
barbam rigentem dum Iovis circumplicat,
dum defluentem leniter flectens comam
limat capillos et corymbos Liberi,
et dum Minervae pectus hydris asperat,
iniecit atram territis formidinem,
ut fulmen aeris ceu Tonantis horreant,
tremant venenum sibilantis Gorgonae,
putent ephebum post triumphos Indicos
ferire thyrso posse, cum sit ebrius.