Latin · ~7 min
Lines 2.1-2.84
Prudentius, Liber Peristephanon 2.1-84
Not analysed yet
Antiqua fanorum parens,
iam Roma Christo dedita,
Laurentio victrix duce
ritum triumphas barbarum.
reges superbos viceras
populosque frenis presseras,
nunc monstruosis idolis
inponis imperii iugum.
haec sola derat gloria
urbis togatae insignibus,
feritate capta gentium
domaret ut spurcum Iovem,
non turbulentis viribus
Cossi, Camilli aut Caesaris,
sed martyris Laurentii
non incruento proelio.
armata pugnavit fides,
proprii cruoris prodiga;
nam morte mortem diruit,
ac semet inpendit sibi.
fore hoc sacerdos dixerat
iam Xystus adfixus cruci,
Laurentium flentem videns
crucis sub ipso stipite:
‘desiste discessu meo
fletum dolenter fundere!
praecedo, frater; tu quoque
post hoc sequeris triduum.’
extrema vox episcopi
praenuntiatrix gloriae
nihil fefellit: nam dies
praedicta palmam praetulit. 1
qua voce, quantis laudibus
celebrabo mortis ordinem?
quo passionem carmine
digne retexens concinam?
hic primus e septem viris
qui stant ad aram proximi,
Levita sublimis gradu
et ceteris praestantior,
claustris sacrorum praeerat,
caelestis arcanum domus
fidis gubernans clavibus
votasque dispensans opes.
versat famem pecuniae
praefectus urbi 2 regiae,
minister insani ducis,
exactor auri et sanguinis,
qua vi latentes cruat
nummos, operta existimans
talenta sub sacrariis
cumulosque congestos tegi.
Laurentium sisti iubet,
exquirit arcam ditibus
massis refertam et fulgidae
montes monetae conditos.
soletis, inquit, ‘conqueri
saevire nos iusto amplius,
cum Christiana corpora
plus quam cruente scindimus.
abest atrocioribus
censura fervens motibus;
blande et quiete efflagito
quod sponte obire debeas.
hunc esse vestris orgiis
moremque et artem proditum est,
hanc disciplinam foederis,
libent ut auro antistites.
argenteis scyphis ferunt
fumare sacrum sanguinem,
auroque nocturnis sacris
adstare fixos cereos.
tum summa cura est fratribus,
ut sermo testatur loquax,
offerre fundis venditis
sestertiorum milia.
addicta avorum praedia
foedis sub auctionibus
successor exheres gemit
sanctis egens parentibus.
haec occuluntur abditis
ecclesiarum in angulis,
et summa pietas creditur
nudare dulces liberos.